Sa kalawakan ng isang unibersidad sa Maynila ay matatagpuan mo ang iba’t ibang estudyante ng bagong henerasyon. Pasukin natin ang GSPub office. Una mong matatagpuan si Azhena Keim Nievez, ang medyo mataray ngunit mabait na headwriter ng Golden Sparrow Publication. Unica hija ng pamilya Nievez kaya’t alagang-alaga ng kuya niyang si Hezron Keith na nagkakagusto sa isang napabalitang witch na si Hania Mitropolus.
Nasa tabi ni Azhena si Renzther Geuvon, ang Russian computer genius ng grupo na maraming alam na lenggwahe ngunit hindi matuto-tuto ng Filipino kaya palaging may bitbit ng English-Tagalog/Tagalog-English dictionary.
Sa isang mesa naman ay matatagpuan ang may kayabangang si Al Vou Lherio, ang GSPub writer na isa ring ramp and print model na pinangangalandakan palagi ang kanyang kaguwapuhan. Madalas siyang may hawak na salamin at panay lang ang pag-aayos ng buhok at pagtitig sa sarili. Lingid sa kaalaman ng lahat ay meron siyang munting sikreto na iniingat-ingatan.
At habang abala sa pagkaka-catwalk si Al sa pagitan ng pagsilip sa hawak na salamin ay matatalisod siya sa naka-split na binti ni Val Lherino, ang most outstanding male ballet dancer ng unibersidad na palaging kaaway ni Al. Pagmamay-ari niya ang gitnang bahagi ng opisina dahil madalas siyang nagpa-practice ng ballet doon.
At tuwing sesemplang si Al, ang unang humahagalpak ng tawa ay si Grace Divina Sebastian, ang Born Again Christian na napupusuan ni Al. Siya ang madalas asar na asar sa pagpapa-kyut ng binata dahil mas gusto niya ang sulyap-sulyapan si Renzther na sulyap naman ng sulyap kay Azhena.
Para matigil ang gulo, mag-aalok ng mga panindang pagkain si Jazzper Vayensel, ang Ingles-kabayong negosyante ng grupo. Nakasanayan na ang walang kamatayang bukambibig niya na chicharon, kropek, polboloron, at shing-aling. Kahit cellphone load pinatos. Mukha siyang walking sari-sari store dahil sa mga bitbit na madalas namang dekwatin ni Al o kung hindi naman ay inuutang lang ng grupo.
At habang abala ang lahat sa kanya-kanyang gawain, hindi nila alam na may isang binatang nakaputing uniporme ang palaging nakabantay sa kanila.
Kapag lumabas ka na ng opisina at maglakad-lakad sa kalawakan ng field ay makakasalubong mo si Mr./Madam Beltrein Schizvenir na kumakanta ng gay version ng Bahay Kubo habang hinahawi ang kanyang imaginary hair. Sa lilim ng mga malalaking puno ng narra ay matatanaw mo ang magugulong sina Enver, Billy, Athus, at Akemy na nagtuturuan kung sino ang nagsuot ng brief ng may brief. Sa study lounge malapit sa open field ay makikita sina Kaimi, Meirah, at Jheru na pinagtatawanan ang kalokohang pinaggagawa nina Enver.
At kapag nakarating ka na sa loob ng isa pang gusali, makikita mo sa labas ng library ang matandang dalagang librarian na si Mayen na daig pa ang teenager kung kumikibot-kibot habang inaalayan ng bulaklak ng janitor na si Mang Onin.
Maya-maya pa ay makikita mong lalapit sa kanila ang mag-asawang Zatina at Devon kasama ang kanilang anak na si Loriean. At habang seryosong nag-uusap ang mga ito ay darating naman ang mag-asawang Mailey at Den Rich na agad namang paparinggan at aasarin ni Zatina.
At kung makakasalubong mo ang ilan sa kanila, malamang ito ang sasabihin nila sa ‘yo:
“Salamat sa malasakit mo pero hindi na kami pwedeng umatras. Malayo na ang narating namin para dito.” –Azhena
“Where is my dictionary? . . . Where is my dic-tio-na-ry?!” –Renzther
“Campus crush ako, ubod ng guwapo, napakaguwapo, pinakaguwapo, hari ng kaguwapuhan, sobrang guwapo, laging guwapo. Pero minsan kailangan ding maging lampa para agaw eksena.” – Al
“Hindi ako sumasayaw ng walang stage.” –Val
“Prayer meeting na naman? Sa kaluluwa nino? Eh hindi ko naman kilala ang matandang iyon ano! Ayoko mag-prayer meeting!” –Grace
“Bili na kayo ng chicharon, polboron, kropeck! Kung ayaw n’yo may shing-aling din ako dito!” –Jazzper
“Brief meeting? Gagawa tayo ng brief potion and spell? Yes! May isusuot na ako!” –Billy
“Kung hindi talaga pwede, huwag mo ng pilitin. Kung talagang mahal mo siya, isipin mo na lang ang kaligtasan niya. Ayos na ang set up na ito. At least, buhay siya.” –Jheru
“Hangga’t nadito ang guwapo mong kuya, walang mangyayari sa iyong masama. Pangako.” –Hezron
“Pakuluan ang mixture… Shabooya! Shabooya!” –Hania
“Kesyo, bakit daw hindi ako magaling? Bakit hindi ako ang pinakamagaling? Kailangan daw mahigitan ko ang lahat. Dapat ako ang the best. Nakakainis!” –Loriean
“It says here, Keep quieeeett!!! Mga walang galang! Hindi n'yo na ginalang ang library!” –Mayen
“Valer kuberch kahit jutay, ang julamantrax donchi ay anek-anek!” –Beltrein
